 |
HEI MAHI 3
TE TOROTORO I NGĀ WHANAUNGATANGA
AHUREA
3.3 NGĀ UARA E WHĀIA ANA E TE KATOA
I ētahi wā e kīia ana te ao he ‘kāinga ao’. Ko te tikanga o tēnei,
he nui atu te whakawhitiwhiti kōrero, whakaaro hoki i waenganui
i ngā iwi o te ao, ā, he nui atu te whakawhirinaki a tētahi whenua
ki tētahi atu tēnā i ngā wā o mua. He aha ngā uara e whāia ana
e te katoa? Ka taea anō e tātou he pūnaha matatika mō te ao nui
tonu, he ahurea maungārongo, te whakawhanake?
Kua whakatakotoria e te Komihana Ao mō te Ahurea
me te Whakawhanaketanga ētahi tino mātāpono e rima, e mahi ngātahi
ai ngā iwi katoa, e manaaki ai ngā iwi
tētahi i tētahi, e mau anō ai te rongo ki te ao i ngā rā e heke
mai nei.
Anei aua mātāpono*
1 Ngā motika tangata:
Me āhei ia tangata ki ngā huarahi pai katoa ai tana noho ki tēnei
ao; kia āhei anō ia ki te whakamahi i ōna motika ohaoha, pāpori,
tōrangapū, ahurea hoki.
2 Te manapori:
Ko te manapori te papa mō te whanaketanga; e tika ana kia riro
mā ngā tāngata anō e whakahaere te āhua o tā rātou noho ki tēnei
ao i tēnei wā, hei ngā wā hoki e tū mai nei.
3 Te whakaahuru
i ngā rōpū tokoiti:
E tika ana kia tautoko ngā kaupapa-here ahurea i te puta o te
māramatanga me te whakaaro rangatira i waenganui i ngā rōpū ahurea
tokoiti me ngā rōpū tokomaha.
4 Te whakatau riri
i roto i te rangimārie:
Me whakatipu ngā mātāpono o te tāporetanga, te mahi ngātahi me
te manawanui. Mā te mātau haere me te mōhio ki ngā ahurea rerekē
tēnei e taea ai.
5 Te tautika i
roto, i waenganui hoki, i ngā whakatipuranga:
Me whakamahi ngā whakatipuranga o nāianei i ngā rawa o te taiao,
ngā rawa māori me ngā rawa ahurea hei painga mō ngā tāngata katoa
nāianei, me ngā whakatipuranga ka whai i muri iho.
Whakaarotia ēnei mātāpono, ka whakakī takitahi
ai i te papatau e whai ake nei me te whakamahi i āu ake kupu.
|
|
|