HEI MAHI 7
TE WHAKAARO MŌ NGĀ WĀ E TŪ MAI NEI
KO NGĀ PAKI WHAKATOKO WHAKAARO MŌ TE MAHI 7
TE WHAI WHAKAARO KI NGĀ WĀ KEI TE HAERE MAI
Te mangō e āmio tōtahi ana
Kei te ū tonu a Aotearoa ki te whakaaotanga. He maha ō tātou ariā
hou hei mahi moni. He maha ngā mea rerekē e mahia ana e tātou,
ā, e tiaki ana tēnā me tēnā i a ia anō. Heoi anō, ehara a Aotearoa
i te whenua e whiwhi angitu ai te katoa.
I te tau 2010 ka kite tātou kua tino rerekē te whenua mai i
te tau 2000. Kua whanake i waenganui i ngā tāngata o Aotearoa
te kaha hihiri ki te mahi i ngā mahi hou me te wero i te ao. He
nui ngā pakihi o Aotearoa e hokohoko ana i ā ratou hua ki tāwāhi,
ā, e mōhiotia ana he kaingārahu o te ao mō te āhua o tā rātou
mahi i ā rātou mahi.
I whanake tēnei kaha i waenganui i ngā tāngata o Aotearoa i
muri i ngā wā uaua i ngā tau tīmata o te rautau 21. I uaua kē
atu te hoko atu i ngā hua o te pāmu pēnei i te wūru, i te mīti
me te tīhi ki ērā atu whenua. I ara ake he pakihi hou hei whakakapi
i ngā mea tawhito; he nui ēnei pakihi hou e mahi moni ana i runga
i te whakamahi i ngā ariā punenga me ngā tikanga mahi hou. He
nui ngā moni i whakapauhia ki ngā rangahau pūtaiao, kei roto i
ēnei ko te raweke i ngā ira o ngā tipu me ngā kararehe. Kei te
whakanao a Aotearoa ināianei i ngā hua kai hou, he pai atu hoki,
e hokohokona paitia ana ki tāwāhi.
Whakamahi ai te maha o ngā kamupene i te hangarau rorohiko ki
te hono atu ki ētahi atu, ki ngā wāhi katoa, i ngā wā katoa. Tū
ai ngā pakihi ināianei ki ngā wāhi katoa o Aotearoa. Kua pōturi
haere te tipu o te taupori o Tāmaki-makau-rau.
He iti te wāhi ki te Kāwanatanga. He māmā tonu ngā tāke; kāore
e nui ngā moni e whakapauhia ana e te Kāwanatanga i runga i te
hauora me te mātauranga. Heoi anō, e hiahia ana ngā pakihi kia
whai ā rātou kaimahi i te mātauranga pai, nā reira e hoatu moni
ana aua pakihi ki ngā kura me ngā whare wānanga. Ahakoa tērā,
he nui ake te utu ināianei mō te haere ki te kura me te whare
wānanga i ngā tau o mua. Kua nui atu te utu ināianei mō te haere
ki te tākuta, ki te hohipera rānei. Ka hapa i ngā tāngata pōhara
te mātauranga me ngā ratonga hauora.
Ka kite ngā tāngata o Aotearoa i a rātou anō he kirirarau o
te ao, kāore noa iho hei kirirarau o Aotearoa. Kei te whakamahi
tātou i te Ipurangi hei whakawhitiwhiti i ngā mōhiohio, hei whiwhi
i te mātauranga me ngā ahurea mai i ngā tōpito o te ao. He maha
ngā tāngata e mahi ana mā ētahi kamupene e rua, neke atu rānei.
Ka taea e rātou te hangarau rorohiko te whakamahi kia mahi ai
rātou mā ngā kamupene rerekē i ngā whenua rerekē.Ko tā te nuinga
o ngā tāngata he tiaki i a rātou anō, kua iti haere tā rātou atawhai
ki ētahi atu. Ko te hua o tēnei, kāore tō tātou porihanga e kaha,
pērā i tērā o mua atu. Kei tua atu i tērā, i te whakaaotanga,
kei te ngaro haere tō tātou tuakiri ā-whenua.
He rerekē ngā pānga o ēnei āhuatanga hou ki te taiao māori.
Kei tētahi taha, kua whakaitihia ētahi para me ētahi parakino.
Nā te hora o ngā pakihi puta noa i te whenua, kua iti ake ngā
taero waka me ngā pēhanga ki ngā ratonga tāone pēnei i te wai
me te parakaingaki. Kei tētahi atu taha, nā te warea o te tangata
ki tōna ake oranga, ka iti ake te mahi ngātahi hei whakakore atu
i ngā raruraru taiao.
He rite a Aotearoa i te tau 2010 ki tētahi mangō e āmio haere
ana i te ao hei kimi i ngā mea e angitu ai ia. He ahumahi hangarau
hou ā tātou, he kaha hoki tātou ki te whakawhanake i ngā ariā
hou. Kei te nui haere te whai moni, te whai rawa o Aotearoa. Heoi
anō, kāore anō kia kitea e tātou te huarahi tika hei whakakore
i ngā raruraru pāpori pēnei i te pōhara me te takahi i te ture
– kei te kaha kē atu ērā raruraru, kei te kaha kē atu.
|
