HEI MAHI 7
TE WHAKAARO MŌ NGĀ WĀ E TŪ MAI NEI
E kore tēnei mea te wā e tū, nā reira kāore e taea te āta wehe
tūturu ngā wā o mua, te wātū, me ngā wā kei te haere mai. He nui
ngā titiro ka taea ki te wā, te wā o mua, te wātū me te wā kei
te heke mai. Ki ētahi rōpū ahurea, he porohita te āhua o te wā,
ki ētahi atu he rārangi tōtika.
Kāore anō tātou kia pā atu ki te wā kei te haere mai. He huhua
ngā ara rerekē atu i te wātū nei ki te wā kei te heke mai; me
te mea nei he mānia tino rahi e hia kē nei ōna ara whakawhiti.
He mutunga kore te maha o ngā kōrero ka taea mō te wā kei te haere
mai.
Ko ngā pakimaero pūtaiao he momo tuhituhi mō ngā wā kei te heke
mai.
Kia māmā atu ai te whakaaro ki ngā wā e tū mai nei, kōrero ai
tātou mō ngā āhuatanga tērā tonu pea ka heipū i ngā rā kei te
tū mai, mō ngā āhuatanga tērā ka heipū, me ērā e tūmanakohia ana
ka heipū. Ko te āhua o tā tātou whakarōpū i ngā āhuatanga i ngā
rā kei te tū mai, kei te āhua tonu o ō tātou uara, tūmanako hoki.
Tērā ka heipū
… Koia ērā ko ngā āhuatanga e whakapae
ana te tangata tērā ka pā i ngā wā kei
te heke mai. Tērā pea ka tino rerekē ēnei
i ērā o nāianei. Ki konei tukuna ai tō hinengaro
kia rere, kia auaha.
Tērā tonu pea ka heipū
… Koia ērā ko ngā āhuatanga e āhua whakapono
ana te tangata ka pā i ngā wā kei te heke mai.
Mēnā e whakaponotia ana he kino ka pā i ngā
rā kei te tū mai, mā te tuhituhi pea e whakatītinahia
ai ngā tāngata ki te whai i tētahi huarahi kē
e kore ai taua kino e pā.
E tūmanakohia ana ka heipū
… Koia ērā ko ngā āhuatanga e hiahia
ana te tangata kia pā i ngā wā kei te heke mai.
Tēnā pea he wawata ēnei mō ngā rā
kei te tū mai – he wawata ka whakatītina i te tini tāngata
kia whai i tētahi aronga pai ake, whaihua ake.
Me kī he huinga iti ngā tērā tonu
pea ka heipū me ngā e tūmanakohia
ana ka heipū nō ngā tērā
ka heipū (tirohia te hoahoa huinga). Ko te wāhi
o waho atu i ngā tērā tonu pea ka heipū
me ngā e tūmanakohia ana ka heipū,
he āhuatanga kāore e hiahiatia, ā, e whakaponotia
ana kāore e pā.
|
