 |
HEI MAHI 8
TE WHAKAARO KI TĒNEI MEA, TE HURI
TE WHĀRANGI RAUEMI MŌ TE MAHI 8.2
HE KUPU WHAKARITE MŌ NGĀ WĀ KEI TE HAERE MAI
He rite ngā wā kei te haere mai ki tētahi kēmu piu mataono
Ka tūpono pā ngā mea e hia miriona nei ia hēkona, ā, ki te whakahokia
taua hēkona, tērā pea ka rerekē katoa ngā putanga, ka rerekē hoki
ko ngā wā kei te tū mai. Ka kite tētahi kaimātai pūtaio i tētahi
maremaretai kua kino te āhua, porowhiua ana e ia… māna, ka āta
titiro rānei a ia ki taua mea, ā, ka kite i te rongoā paturopi.
Mā tētahi mahi tupurangi, mā tētahi raupapa mahi tupurangi rānei,
ka rerekē katoa ngā wā kei te tū mai. Me whakaae tātou he wāhi
nui kei te heipūtanga, ā, me pīkau ko ngā aituā ka tūpono mai,
ka whakanui i ngā waimarie ka tūpono mai.
He rite ngā wā kei te haere mai ki te rere rōnakinaki
i te pō
Kei runga tātou i tētahi waka rōnakinaki e rere ana i tōna ara
pūmau tē whakatakahia. Kāore tātou e mōhio ana ki te aronga o
te waka, nō te mea e pōuri ana. Ina tūpono pā te haeata i ētahi
wā, ka taea te kite mō te wā tino poto he aha kei mua tonu i te
aroaro. Nō te mea kua whakamaua tātou ki ngā tātua tūru, kāore
e taea e tātou te paku aha hei whakarerekē i te ara kei mua i
a tātou.
He rite ngā wā kei te haere mai ki tētahi waka i runga
i tētahi awa nui
Kei runga tātou i tētahi waka e rere ana i te awa, he whai tahataha,
he whai ia kaha taua awa. Engari he kaha ake tō tātou āhei ki
te tia i te waka nei tēnā i waka rōnakinaki. Me whai haere tonu
tātou i te awa, engari ka pai noa te titiro whakamua me te karo
i ngā ripo me ngā tāhuna. Ina tokomanga te awa, mā tātou tonu
e kōwhiri te peka kia whāia, ka mau tonu ki tērā ā tae noa ki
te ūnga.
He rite ngā wā kei te haere mai ki tētahi moana nui
tonu
Kei runga tātou i tētahi kaipuke e tere ana i te aumoana. He maha
ngā ūnga ka taea, he maha hoki ngā ara ki aua ūnga. Ka taea e
tātou te kōwhiri te wā kei te haere mai ka hiahiatia e tātou,
mēnā ka whakapau kaha ki te whakatutuki; arā tonu ngā ia, ngā
āwhā me ngā pūkawa kia ekengia, engari ki te tūpato tātou ka āhei
tātou ki te whakatere i te waka ki te ūnga ka hiahiatia.
Te pū: Futures Kit New Zealand Futures Trust 1999
|
|
|