HEI MAHI 6
TE TŪHURA UARA
Ko ngā uara ngā mea e tino whai tikanga ana ki a tātou; ko ngā
uara e tārai ana i ā tātou kōwhiringa i roto i ngā kawenga o ia
rā.
He maha ngā ara ka whāia e tātou ki te whakawhanake i ngā uara,
ki te whakatau kōwhiringa hoki:
• Ka whakaarohia e tātou te whānuitanga o ngā kōwhiringa – he
aha ngā huapai me ngā huakino o tēnā, o tēnā o ngā kōwhiringa?
He aha i pai ake ai tētahi i tētahi atu?
• Ka whakatau tātou he aha ngā mea e whakahirahira ana, e kura
ana rānei ki a tātou – mā konei e āwhinatia ai tātou ki te mōhio
ki ngā take e pai ake ai tētahi kōwhiringa i tētahi atu.
• Ka whāki tātou i ā tātou kōwhiringa
ki ō tātou hoa, ki ō tātou whānau hoki.
• Ka whai tātou, ka ū anō tātou ki ā
tātou kōwhiringa; ka noho te kōwhiringa hei wāhanga
o tō tātou oranga. Ka whakatau tātou i ērā
atu kōwhiringa e hāngai ana
ki aua uara.
• Ka whakaaroaro tātou ki ā tātou kōwhiringa, ka matapaki hoki
ki ētahi atu. Mā ēnei matapakinga pea tātou e kawekawe ki te whakaaro
anō ki ā tātou kōwhiringa.
Kei tēnā, kei tēnā o tatou ō tātou
ake uara, kei tēnā, kei tēnā o ō tātou
whānau tō rātou huinga uara. E whai pānga
ana ētahi uara ki ētahi matawaka, ki ētahi rōpū
iti rānei o tētahi whenua.
Tērā tonu ka huri ngā uara i te takanga o te wā.
Ka whanake haere tō tātou māramatanga ki ō
tātou ake uara i runga anō i ngā wheako ka pā;
me te aha, ka huri pea ko ngā uara. Tērā pea ka
rerekē ō tātou uara i ērā o ō tātou
mātua, tūpuna.
Tēnā āta whakaarohia ko ēhea o ngā
huarahi o runga ake nei kua whāia e koe ki te whakatau, ki
te whakaatu rānei ko wai koe.
|
